तोकिदेउ सिमाना भो सामिप्यता खति भयो यहाँ(गजल)

तोकिदेउ सिमाना भो सामिप्यता खति भयो यहाँ
जाल झेलको समुन्द्रमा आदर्शता सती भयो यहाँ

चर्केको यो सबन्धलाई कति टालटुल पारि राख्ने
समयले घाउ पुर्छ भन्थे तर पिडा अति भयो यहाँ

आउ माया तौलिऔं कसले कति समर्पण गर्यो
जनाएन सूचक तराजुले परिमाण कति भयो यहाँ?

द्वन्द्व बिचारको थियो मुटु घायल भई लड्न पुग्यो
नठान्दा सर्वोपरि बन्धनलाई ठूलो क्षति भयो यहाँ

अल्झेथेँ हाँसोमा तीखा शब्दले बन्धन फुकाउँदैछ
घात र अन्तर्घात यो जिन्दगीको के प्रगति भयो यहाँ

सुरुवातमै आइ पुग्यौ आखिर प्रेमको चक्र पुरा गरि
बुझाउन खोज्दा मनको ज्वाला भतभती भयो यहाँ।।