ढिका त फुट्यो तर मल जमिनमा परेन अझै(गजल)

ढिका त फुट्यो तर मल जमिनमा परेन अझै

थाप्लोको साहूको ऋण यो सालपनि सरेन अझै

कहिले खडेरी कहिले भेल बाढी कहिले पहिरो

वर्षभरि खट्दा पनि खेतमा दुई छाक टरेन अझै

बाजेले हलोसँग खेले बुबाले ठेले मेरा पालिमा झेलेँ

नेताले फुक्ने आधुनिक कृषि हाम्रा देशमा झरेन अझै

राष्ट्रवादी प्रकृति प्रेमी उपमा अनेकन् भिराए पनि

पुस्तै बितायौ माटोसँग तर इज्जत कसैले गरेन अझै

नाला सुके फर्काउने मान्छे छैनन् आजकल गाउँमा

बाझो रहे वरपरका फाँट बीउ कसैले छरेन अझै ||